馮氏兄弟買起Hello Kitty

【明報專訊】馮國經同馮國綸兩兄弟打骰嘅利豐（0494），近呢幾年都鍾意透過東征西討、周圍收購嚟壯大業務，近期私有化利和經銷（2387）後，噚日市場就傳出，利豐最新嘅入股目標，係擁有Hello Kitty呢隻卡通人物嘅日本公司Sanrio。

呢單消息傳出後，小琴同唔少中環女「賓架」都周圍八吓係真係假，因為Hello Kitty曾幾何時，都係我哋少女時代鍾意過嘅公仔，所以都好留意係咪真係落入馮氏兄弟之手。

私人投資公司購1.03%股權

後來小琴打去利豐問下，先知入股Sanrio嘅，唔係利豐，而係馮氏兄弟私人持有嘅投資公司，買入嘅股份數目亦唔多，只係1.03%股權，以噚日日本收市價計，盛惠都只係1億4千萬港紙左右，對身家豐厚嘅馮氏兄弟，絕對係「碎銀」。

馮氏兄弟持有嘅利豐，同Hello Kitty一直有合作開，喺08年就已經簽訂採購協議，當時馮國綸仲講過，希望擴大日本業務佔成間公司嘅收入比重。只係奇就奇在，今次入股點解唔直接由利豐去入股，而係在私人荷包出錢。

不過無論入股方式係點，市場都估計利豐同Sanrio將來嘅合作一定會愈來愈緊密。

或將Hello Kitty帶入反斗城

小琴同啲外資行分析員傾過，都話消息對利豐絕對正面，預期將來仲可透過私有化利和經銷得嚟嘅亞洲物流同分銷業務，將Hello Kitty帶入中國。不過小琴就覺得，Hello Kitty 同馮氏兄弟私有持有嘅玩具反斗城相連性大啲，話唔定第時去到反斗城，見到嘅唔再係長頸鹿，而係Hello Kitty呢！

報料電郵﹕piano@mingpao.com