貿發局滬露天推40港品牌

【明報專訊】上海世博接近尾聲，特區政府下星期到世博舉行「香港周」，貿發局都趁勢喺上海舉行「時尚香港」展覽，壯大香港聲勢。貿發局搵咗40幾個香港品牌，喺上海出名嘅觀光點南京東路步行街，舉行露天展銷活動。貿發局過往喺上海舉行過唔少展覽，目標係商家，呢次係首次開放畀公眾人士參觀嘅展覽。

特製600間港舖「曬冷」圖

展覽於噚日正式開幕，吸引唔少人入場。貿發局主席蘇澤光、行政總裁林天福參與開幕活動。40幾個品牌中，以服飾、設計品較多，例如﹕港人熟悉的chocolate rain、2%等。現場所見，內地參觀者對飾物、廚具用品較有興趣，不過零售產品唔算多。林天福表示，呢次展覽並非散貨場，最重要係讓內地人知道，香港有好多品牌喺上海開店，但大家行過，未必知道係來自香港。

於是，貿發局特製上海地圖，點出本港嘅店舖位置，原來已有600多間香港店舖遍佈上海，來一次大「曬冷」。

大會希望呢次展覽，建立香港嘅品牌形象，並會安排香港品牌嘅負責人，認識上海嘅大型商場負責人，方便佢哋日後租用大商場嘅店舖。不過，上海已經係成熟嘅市場，有好多外國牌子爭相打入上海，香港品牌要去競爭，仲有什麼優勢？林天福表示，香港品牌從來不怕競爭，最重要是香港的品質及服務，可以挑戰同行。