華懋乃建窗台鼻祖

【明報專訊】施政報告終於落實限制發水樓的措施，如窗台由約20吋減至約4吋，連同預制組件措施，一般窗台由現時普遍30吋減至10吋，過多兩、三年，新樓買家唔使再瞓窗台啦。

話時話，其實窗台係由華懋發明，跟隨王德輝及龔如心多年嘅華懋售樓部經理吳崇武（地產中人稱武哥），對集團發明窗台直認不諱，但自哪個樓盤開始就記不了，佢表示：「唔起窗台冇所謂，空間少咗之嘛，只要大家一樣，我哋無，其他發展商都無，就冇所謂。」

王德輝首創免首期供3月入伙

武哥亦指出，免首期、先供3個月可以入住，都係華懋發明，佢亦承認市况唔好，先需要吸引客人入市，佢話呢啲橋一部分由王生（王德輝）諗，例如免首期等。

讀者可能有所不知，窗台唔係樓面嘅一種，發展商想用本身准許可建樓面去起，都唔可以，但整個30吋深窗台卻係全數豁免樓面。小琴慨嘆呢一個無厘頭嘅產物，唔知令本港發展商賺多咗幾多錢，但搞咗咁多年，政府先宣布大窗台壽終正寢。話時話，噚日華懋位於黃竹坑嘅南灣海景酒店正式開幕，現時執掌華懋的龔仁心醫生十分風騷，滿場飛招呼賓客。