【明報專訊】近日創業板上司公司中國3D數碼娛樂（8078），喺財經傳媒間引起咗好大嘅哄動，事關間公司邀請一眾財經記者，觀摩一吓佢哋即將上映電影嘅預告片。究竟咩預告片咁巴閉？就係喺內地引起熱烈討論的全球首部3D色情電影——《3D肉蒲團》囉！
今日放映會 請埋財經記者睇
其實自3D肉蒲團開拍以來，早就引起娛樂版行家嘅關注，連外國傳媒，好似法新社、英國《太陽報》等等都爭相報道，不過公司約見財經記者，都係第一次。中國3D數碼娛樂前身係楊受成旗下嘅英皇娛樂，後來買咗彩票業務改名做龍彩娛樂後，又向變靚D（8079）買入電影製作公司，仲邀得鬼才蕭若元父子入公司，並由蕭定一出任執行董事。公司近年最大的project，就係拍3D肉蒲團，盛傳已經用咗過億資金拍攝，仲特意從日本請來兩位AV女優參與製作。放映會今日就會舉行，唔知除咗預告片之外，主角會唔會現身撐場呢？
講開套戲，雖然由於有情慾鏡頭，內地上映無望，不過人嘅心理就係咁，你愈唔畀佢睇，佢就愈想睇，內地網民紛紛「翻牆」在網上尋找3D肉蒲團嘅資料，連預告片、花絮等都唔放過，好似在內地視頻網站土豆網同激動網等等，條條同3D肉蒲團有關嘅短片，點擊率都勁熱，媲美早前網民點爆AV女優蒼井空嘅微博。
內地上映無望 視頻網短片熱爆
為咗捕捉呢個商機，蕭定一早前已經講明同內地旅行社傾緊，可唔可以包團帶內地旅客嚟香港欣賞3D肉蒲團，順便搵真銀。
小琴睇返中國3D數碼娛樂份業績，過去幾年都係蝕錢，既然網民咁期待3D肉蒲團，唔知呢套戲有冇可能幫公司重新賺錢？仲有，現時本港歷來最賣座的三級片，係由梁朝偉同湯唯掛帥嘅《色．戒》，在香港收咗近5000萬元，唔知3D肉蒲團有冇機會打破呢個紀錄呢？不過小琴都唔敢太樂觀，因為喺香港上市嘅電影概念股，下場通常都唔太好，即使有星爺坐鎮嘅比高集團（8220），喺內地上演嘅《長江七號》動畫版票房都麻麻，希望3D肉蒲團能夠幫中國3D數碼娛樂，打破電影股一直以來表現平平嘅宿命啦！
報料電郵﹕[email protected]
