Tiffany強攻中國市場

【明報專訊】同求婚鑽戒幾乎晝上等號嘅美國珠寶商Tiffany & Co.，同唔少歐美奢侈品一樣，都話要大力發展中國市場，佢個董事長Michael J. Kowalski近日便矢言，大陸將會成為最多Tiffany新舖嘅地區，Tiffany股價即刻創海嘯後新高，睇嚟市場都非常睇好Tiffany響內地嘅發展空間。計小琴話，既然Tiffany力銷「中國故事」，就應該嚟香港上市，個故仔先夠完整！

Tiffany家喺中國有12間零售店和精品店，其中上海有4間，北京有3家。Kowalski接受《中國日報》訪問時話，Tiffany未來3年計劃響中國開設25至30間舖，而且會繼續擴大二三線城市嘅投資。而Tiffany今年1月至出年1月嘅財政年度，新開14間新舖當中，有4間就係設於中國。

Kowalski仲話，公司今年第2季單係中國嘅業績比舊年同期升近三成，多得中國市場帶挈，預計Tiffany亞太地區全年銷售可以實現20％增長。

報道噚日出街，Tiffany美國股價即創海嘯後新高，市值去到67.5億美元，接近530億港銀，反映市場對佢哋個「中國故事」相當受落。小琴身邊不少女強人，都好期待Prada明年來港上市，因為咁耐以嚟畀Prada賺咗唔少錢，想買返Prada啲股票「對冲」吓。依照咁嘅邏輯，如果Tiffany嚟香港上市，都會獲得唔少香港女士追捧，加上Tiffany呢期sell中國概念，更加應該嚟香港掛牌。各位I-Bank大佬，諗諗佢啦！