修身堂除權 「身形暴漲」

【明報專訊】潮流興瘦身，不過做纖體生意嘅修身堂（8200，臨時櫃位8393）噚日就反其道而行，「身形暴漲」，皆因佢噚日股價曾勁升超過兩倍，收市市值急漲至2.3億元。修身堂收市後出通告話不明股價升因，之不過其實修身堂呢排都幾多搞作，早幾個月前公布，將股份十合一後，再一供六並發換股債及權證，成個股本重組計劃今個月2號開始生效，噚日係除權後首個交易日，公司股價即有反應，足證靚女主席張玉珊財技不輸金融界才俊。

港股呢兩日升到「嘭嘭聲」，股價冇返十幾個巴仙升幅，都幾難上到20大升幅榜。不過修身堂噚日響呢個大升浪入面，勁升最多2.4倍，自然令股民側目。雖然修身堂收市升幅收窄至1.5倍，報1.14元，但都榮登20大升幅榜首，全日成交亦由平日只得幾百萬股，急增至成1300萬股。

市值一日倍增至2.3億

股價勁升，公司市值自然亦水漲船高，修身堂市值一日間就倍增去到2.3億銀。記得華創（0291）前董事長宋林曾經解釋，佢身形同公司市值掛鈎，所以愈來愈好「福氣」。好在張玉珊身形型唔會跟住公司市值暴漲，否則都唔知點樣做「生招牌」咯！

報料電郵﹕piano@mingpao.com