蔡老闆淡出亞視 旺旺廣告跟着走

【明報專訊】中國旺旺（0151）噚日股價升至高位，收報7.77元。集團早前發表嘅中期業績都唔錯，盈利升咗33％。產品大賣，投放喺廣告嘅錢當然唔會少，不過，自從老闆蔡衍明投資亞視意興闌珊，旺旺嘅廣告減少喺亞視播放，無綫就間接受惠，接收旺旺廣告。

早排177億買台灣有線電視控股權

小琴以前睇親亞視，都會睇到旺旺嘅廣告。老闆蔡衍明曾經講過，自己係亞視股東，旺旺廣告自然放喺亞視播放。但小琴近期發現，亞視冇乜旺旺廣告，無綫反而多咗。小琴同亞視中人傾開，佢哋話旺旺廣告少咗，相信同蔡老闆淡出亞視有關。

自從廣管局接受昌興國際（0803）主席黃炳均成為亞視股東，黃炳均佔亞視超過五成股權，蔡老闆就只係同查懋聲合營Anthena，持有47.58％，成為第二股東。

蔡老闆之前對亞視雄心壯志，家冇咗話事權，當然將興致轉移至台灣，早排就以177億港元，取得台灣第二大有線電視網絡中嘉控股權，規模遠遠大過亞視，唔怕冇電視業玩。