有話說﹕「特異功能」訓練班

【明報專訊】為人父母，有邊個唔想仔女讀書專心、記性好，攞100分吖！可惜往往事與願違，咁做家長嘅，唯有絞盡腦汁，搵方法幫佢哋。


Mama同朋友，早排喺facebook見到有一間教育中心搞免費講座，話有辦法「幫小朋友腦袋升級，輕鬆學習」。嘩！咁犀利，反正講座又唔使錢，仲聽足兩個幾鐘，Mama同朋友呢啲師奶仔，就梗係唔執輸，仆倒去參加啦！


上星期，同朋友準時到達，坐低無耐，講員就出現。Mama一心以為，呢類題目會由心理學家、社工之類講解，但出乎意料，竟然係由一名主修金融、做開金融投資嘅後生仔主講。不過一場嚟到，都無所謂啦，最緊要學到嘢啫。


前半部，呢位後生仔講好多父母應該點樣畀清晰指示仔女，佢哋先能夠接收到重點；之後，又講下學習方式分視覺型、聽覺型，以及觸覺型，只要搵啱細路嘅學習方式，就自然吸收得快、學得好。


講真，呢啲都唔係乜嘢新鮮事，Mama聽過無數次，正當開始「釣魚」瞌眼瞓時，講員就安排咗一場非常精彩嘅表演，令Mama精神為之一振。


稱「全腦開發」增強記憶

講員叫咗兩位小學員出嚟，佢哋已經接受過「全腦開發」訓練，活化咗位處中腦嘅松果體，所以就算蒙住眼睛，都可以辨別到前方嘅顏色、數字和圖像。講員先播音樂，話要畀兩位小朋友放鬆，之後，佢哋就用黑色眼罩蒙眼，單憑手摸，已經分辨到卡嘅顏色、卡上嘅數字，而且百發百中，仲可以摸到圖案，照辦煮碗畫番出嚟。


當全場家長睇到目瞪口呆時，講員話呢啲未算勁，最高層次係連摸都唔使摸，單憑「感應」已經知道。於是，講員即席叫幾位家長喺一塊小白板上寫字，寫中文、英文、數字都得，然後遠距離舉起白板，畀蒙眼嘅小朋友「感應」，竟然又係全中喎！


家長相當驚訝，亦唔明白點解呢兩個細路可以有咁嘅「特異功能」。不過，講員無好詳細解釋，只係話用音樂、遊戲、運動去活化小朋友嘅松果體，黃金期係6至12歲，九成細路只需兩天就學識。活化松果體，就能全腦開發，好處係令人讀書專心、記憶力增強，望兩眼已經輕鬆取得好成績。


後生仔講完一輪，跟住就sell課程，原價近6000蚊嘅兩日課程，即場報名減至4000蚊。朋友睇完表演之後蠢蠢欲動，好想自己嘅細路都識得呢種「特異功能」，咁以後溫書、做功課就快好多。不過，Mama就叫佢咪衝動，聽下其他專家意見先決定都未遲。


醫生解謎：偽科學

Mama帶住滿腦子疑問，請教相熟嘅腦神經外科專科醫生梁嘉銘，佢以「偽科學」嚟形容呢類課程。梁醫生話，位處左右腦中間，的確有一顆如一粒花生大細嘅松果體，屬於內分泌組織，臨牀證實佢同褪黑色素有關，主要幫人用嚟調節日與夜嘅生理時鐘；另外，有科研亦指，松果體有抑制性激素嘅作用。但就無證據顯示，松果體跟記憶力、專注力有關。


梁醫生解釋，腦部嘅記憶功能主要靠穹窿（Fornix）這束弓形神經線連接海馬體，因此，如中風、出血令穹窿受損，因線路中斷了，記憶力便會下降。至於連繫左右腦，亦非靠松果體，而係胼胝體（corpus callosum），而且傳統醫學上又指出，從腦發展角度，大部分腦細胞聯繫發展係喺6歲以前形成，6歲後便會緩慢下來，所以佢對6至12歲係活化黃金期有保留。


聽完梁醫生一席話，相信各位家長都心中有數，Mama亦奉勸大家，要明辨是非，小心選擇教育課程。