利苑平民化 出「叮叮餐」

【明報專訊】貴為米芝蓮美食一星、有「名人飯堂」之稱嘅利苑酒家，打算平民化，推出「叮叮餐」，同波仔飯、叮叮粥、便利店點心爭市場。利苑主席陳樹杰噚日主持銅鑼灣時代廣場新店開幕，佢話計劃下一步係開工廠，製作湯水、點心、小菜零售，顧客翻熱就食得。

湯水煞食 料可撼低其他牌子

但食客唔知要等到幾時，先可以享用到「利苑叮叮餐」。因為工廠都未起，只係劃咗建廠地點。翻查紀錄，原來利苑2004年就諗過生產零售食品，但6年來都未見影，相信大家都要再等吓。利苑高級營運經理彭武民話，佢哋嘅湯水最煞食，好多名人捧場，相信利苑湯包一定會掃低其他牌子嘅湯包。利苑貴為米芝蓮食肆，推出叮叮裝令平民都可以食到，當然有賣點啦，但又會否令名人嫌佢「降呢」？

分子料理玩fushion 鵝肝配皮蛋

講起名人，傳媒好多時都影到啲名人去利苑食飯，究竟啲名人鍾意食啲乜？陳主席好精靈咁話，「名人食乜唔講得，因為係佢哋私隱，連佢哋嚟過幫襯，都唔可以講」。真係咁秘密？

其實要知名人食乜，睇吓利苑菜牌咪知囉。小琴噚日唔止睇菜牌，仲親自試過利苑新推出嘅分子料理。早排歐洲菜興起分子料理，做中菜嘅利苑都玩吓fushion，包括海膽羊羹、鵝肝晶球、松花皮蛋蜜糖珍珠。

小琴啖落好似啫喱嘅羊羹，充滿海膽味；而狀似蜜球粒嘅，原來係鵝肝，仲配埋皮蛋。酸薑皮蛋食得多，鵝肝皮蛋都係第一次。呢啲菜式咁刁鑽，會唔會好貴？由於全部細細份，一啖就食晒，每份由18至48元不等。

利苑喺本港、內地已經各有10間分店，仲會繼續喺內地拓展。各位投資者想參與埋一份？暫時唔駛諗喇。陳主席話有大把錢，唔需要上市集資喎。

報料電郵﹕piano@mingpao.com