城電播阿凡達曬光纖

【明報專訊】噚日係「電訊魔童」王維基間城市電訊（1137）公布業績嘅大日子，小琴見行政總裁楊主光喺記者會用隻手篤下部超大屏幕電視，就轉咗張簡報，變咗成部超巨型iPhone咁。原來，城電係全年業績會前，專程花費超過10萬元買咗部65吋嘅，叫做E-Board嘅觸控Samsung高清大電視，又可以用手指觸控放大縮細，諗住以後就用呢部超巨型iPhone開記者會，方便高層做簡報咁話喎。

唔單止咁，為咗宣傳旗下香港寬頻嘅1000M光纖服務有幾快，楊主光即席喺記者會現場四季酒店頂樓上網睇Youtube，同一班記者分享用1000M寬頻，睇阿凡達嘅高清預告片有幾咁順。聽楊主光講，家城電好積極係中環一帶嘅商廈鋪電纖線開拓商業客，四季就係其一中間同城電初步試行合作嘅客仔之一喇。