佘詩曼沽北角樓 勁賺800萬

【明報專訊】近日娛樂圈不少明星藝人都趁旺市賣樓，繼天后王菲以約4700萬元沽出揸咗成13年嘅九肚山寶松苑洋房後，市場消息指出，曾奪「視后」嘅無綫花旦佘詩曼，剛以約1368萬元沽出北角半山雲景道海景台一個中高層海景單位，呎價破萬元，創呢個屋苑嘅歷史新高紀錄，持貨8年帳面勁賺逾800萬元，升幅近2倍。

呢個單位面積約1277方呎，2002年阿佘買入價都係500萬元，當時呎價僅3915元，用呢個價錢家只可以買到屯門細價樓。呢個屋苑同類嘅分層單位，喺97年高峰都只係賣到近1100萬元，呎價唔使9000元。聽代理講，阿佘以前曾經將呢個單位作自住用途，但近年就已經無喺度住。

葉翠翠賽西湖單位 4.5萬租出

北角半山雖然地段不及山頂及港島南區，但都係傳統豪宅區，近年區內屋苑呎價均屢創新高，而且仲吸引唔少藝人入市。

唔知係咪做過港姐嘅關係，真係美貌與智慧並重，同阿佘都係港姐出身嘅藝人葉翠翠，早喺2008年海嘯前，就以約3000萬元連掃賽西湖大廈2個單位，其中1個更揸咗數個月後隨即沽出，賺咗成百萬元。

至於佢仲揸住嘅另一個單位，就啱啱以月租4.5萬元租出，1年租金收入有約54萬元，以呢個單位當時買入價約1590萬元計算，租金回報都有3厘多，都咪話唔和味！

報料電郵﹕piano@mingpao.com