Webb將片放Youtube 狙擊陳曉「講大話」

【明報專訊】「股壇長毛」David Webb噚日撰文，質疑國美電器（0493）主席陳曉「講大話」，刻意喺2008年隱瞞黃光裕被捕後嘅負面影響。之後國美透過公關回應，話那個時期的事件並無矛盾，喺2008年時，公司只係如實對外聲明業務營運同供應商關係正常。依家件事雖然可能已要交畀證監處理，不過Webb就唔肯放過陳曉，除咗明串國美公關愈描愈黑外，更加提供埋Youtube片段，要證明陳曉同國美嘅管理層「講大話」。

片段今年8月拍攝

Webb放咗一段Youtube片段上網，名為「黃光裕被逮捕和之後被判刑時對公司的影響」，係國美今年8月為爭取股東支持而拍攝，片段中陳曉就話：「喺2008底，黃光裕畀中國政府調查後，為國美帶嚟好大影響。」

總裁王俊洲又話：「公司嘅資金即刻出現緊張，因為好多銀行都收緊信用額，甚至唔再借錢畀我哋。」

代理財務總監方巍稱：「當時好多銀行立刻停止延長我哋嘅信用額度，本來我哋有60億元（人民幣）嘅信用額度，短短一個星期內下跌至10億元。」

Webb話國美管理層好明顯喺2008年11月黃光裕被捕後，就立即發現問題，但係喺2008年底嘅通告就唔講出嚟，仲話公司一切正常，即係對股東「講大話」。

去片﹕http://webb-site.com/articles/GOMElie.asp