威鋮明年越南搞上市

【明報專訊】內地走咗一條特色社會主義路線，共產黨帶領下，搞經濟、搞資本主義。其他社會主義國家，都開創新方向，越南走社會主義，都要玩最資本主義的遊戲——股市。做塑膠、電子產品威鋮國際（1002），噚日出通告，標題係「建議聯營公司在越南社會主義共和國上市」。

通告話集團持有23.47％權益嘅VS Industry Vietnam Joint Stock Company（「VS Vietnam」），向胡志明證券交易所，提交上市申請，預期明年第一季上市。

小琴好少聽到本港公司，會揀去越南上市，好多公司去海外國家上市，都係揀經濟好、制度完備嘅歐美或者日本市場，集資容易啲嘛。點解威鋮國際揀越南？或者同佢哋業務有關，威鋮喺內地同越南都有生產基地。

小琴搵番資料，過往都有公司去越南上市，主要係配合當地業務。匯豐控股（0005）持有18％股權嘅越南保險商Bao Viet，09年6月喺越南上市。根據09年嘅資料，Bao Viet喺越南保險業嘅市佔率約三成。

匯控合營險商去年中已上市

掉番轉頭，港交所都好想打越南主意，搵越南公司嚟香港上市。2007年港交所主席夏佳理，同財經事務及庫務局長陳家強訪問越南，諗住邀請越南兩大國有銀行嚟香港上市，不過就冇晒下文。

報料電郵﹕piano@mingpao.com