機管局資料披露大獎「降班」

【明報專訊】會計師公會搞咗「最佳企業管治資料披露大獎」，鼓勵企業要夠透明度，喺年報披露多啲公司資料。今年舉辦第11屆，機管局喺「公營/非牟利機構」組別，贏咗10屆，仲「九年霸」攞第一名鑽石獎。不過，今年佢哋由第一名降落第二名白金獎，邊個贏佢哋？答案係冇，第一名懸空。

標準提高 第1名懸空

會計師公會會長兼評審團主席馮英偉話，唔係啲公司退步，而係今年提高評審標準，候選公司未達到最高標準，寧願懸空第一名，都唔亂頒獎。佢話今次提高標準嘅項目，包括獨立董事人數，愈多愈高分；風險管理措施、社會責任披露等資料，詳盡又加分。機管局不妨考慮喺呢幾方面發力，出年又爭番第一名啦。籌委會主席羅卓堅話，今年有幾間公司首次獲獎，亦有啲公司進步咗。不過，業界仲有好多改善空間，例如﹕早啲交年報，唔好等到中期業績，先出番上年年報。要解釋薪酬政策，點解公司盈利下跌，董事都加人工。對社會、環境影響的資料，要向外界披露，最低時薪28蚊，公司就要解釋吓點樣應付喇。