情聖趙世曾 錢與情分得清

【明報專訊】南豐集團家族爭產風波連翻爆出驚人內幕，轟動全城，一向風流的「大情聖」趙世曾形容事件好不幸，「每個人都希望事業有成，老婆仔女一家人相處和氣，但人生就係咁，當你事業成功，就有好多估計唔到嘅事情發生」。

曾經講過感情豐富到一日無女人唔得嘅趙世曾，一生人遇到嘅女人多到可以坐滿整個紅館，處理感情手法固然高招，3個仔女全部都係女友所生，無正式配偶。對於錢同感情睇通睇透嘅佢，噚日仲同小琴分享佢對南豐家族爭產風波嘅身家分配情况。「從法律上嚟講，如果陳生遺產涉及慈善基金層面，佢老婆未必能夠分佔；但如果係喺佢個人名義之下，老婆離婚難免有得分，加上佢老婆同佢生咗兩個女，理論上會分得好好。」

佢形容南豐集團創辦人陳廷驊為人精明，過去都有啲生意來往，雖然佢家精神唔係太好……講到呢度，佢覺得始終係人哋家事，最後仲話「我都唔係好清楚」，無再講落去。但單憑佢嘅分析，已經知道佢對於婚姻衝突引致爭產，好有心得囉。

南豐集團家族爭產案好似追連續劇咁，先爆出創辦人陳廷驊老婆楊福和，因為遺囑分配問題同細女交惡，搞到母女二人對簿公堂。近日再爆出驚人醜聞，陳廷驊被老婆強烈指控不忠，又指佢對曾孫女毛手毛腳，搞到申請離婚。

報料電郵﹕piano@mingpao.com