連卡佛160周年 特首話好難得

【明報專訊】九倉（0004）主席吳光正家族嘅私人生意連卡佛，噚日喺國際金融中心連卡佛舉行160周年慶典，連卡佛喺1850年由2個蘇格蘭商人創立，至今已經有160年歷史，而當年嘅舖頭，只係一家位於中環、以竹棚搭成嘅臨時商店。

同好多商人一樣，吳光正都要為交棒鋪路，除咗之前委任長子吳宗權做會德豐地產嘅副主席兼常務董事外，連卡佛就交畀細女吳宗恩打骰，做連卡佛嘅總裁。噚日公司就請到行政長官曾蔭權做主禮嘉賓，同場仲有最近嘅新聞人物何超瓊同何超鳳。

曾蔭權舉行完亮燈儀式後，就有感而發咁話，企業可以屹立不倒咁多年，係一件好難得嘅事，亦都係香港嘅一個強項。

不過特首、吳光正夫婦及吳宗恩之後無接受記者訪問，就急急腳咁離開，令到一眾記者都無法再跟進問題。