好孩子 網上人氣爆燈

【明報專訊】香江今年上成100隻新股，數量之多，不但比起90年代，小琴初入行時，成個月都未必有一隻新股，可算係大躍進，就算比起好多外國股市，都係大大領先，怪不得股民上網搜尋股票，往往都係搜尋新股。

Google啱啱做完2010年的搜尋紀錄大調查，調查今年香港的熱門搜尋關鍵字，發現最多人搜尋的十大股票之中，8隻係新股，而最多人搜尋，就正正係新股好孩子（1086），不單係「年度超購王」，家仲成為「年度搜尋王」。而非新股的股票只得兩隻，分別係中國稀土（0769）及建設銀行（0939）。

十大熱門搜尋股 8隻新股

話時話，12月都未完，話唔定爆單大大鑊嘅新聞，熱門搜尋關鍵字排名隨時有變。Google按捺不住，12月上旬就公布十大的排名，都算夠薑。

之不過，小琴心想，好孩子喺新聞行內算係歧義詞，即係，呢個名詞既可以係一隻股票，也可以形容好乖的小朋友，所以呢個詞可以喺財經版出現，也大可以喺親子版出現。所以究竟係網民，想搵如何教出一名好孩子的秘訣，抑或係股民想搵隻筍爆好股，實在難料。相反，同時賣兒童產品的博士蛙（1698），就係百分百沒有歧義的名詞，頂多係打錯字，打成「博士娃」，但絕對唔會有人要搵隻博士青蛙。

報料電郵﹕piano@mingpao.com