老婆管教嚴　劉錫明讚文青囡囡乖

【蘋果日報】【爆相爆片】現年53歲嘅劉錫明早年放棄香港巿場，轉攻台灣同內地發展，其後娶咗台灣老婆張齊玲，仲生咗囡囡，妻女喺台灣生活，劉錫明日前趁農曆新年，一家三口返港探媽咪。讀者鄺小姐日前透過《蘋果》「爆相爆片」，分享咗劉錫明帶妻女出現尖沙嘴嘅照片。
鄺小姐日前話：「嗰日下晝6點左右，劉錫明同埋囡囡喺商場佈置度影相，佢踎低搵啲靚嘅角度影全家福，又幫老婆拎手袋，佢好錫老婆同個女。」
返港過年
劉錫明錫到囡囡燶，佢日前回應：「真係世上小情人，新年專登同太太、囡囡返港，同家人食飯見面，我仲同囡囡入長洲，帶佢睇傳統嘢。」囡囡亭亭玉立，樣子清秀，打扮樸素，好有文青feel，劉錫明笑言：「囡囡今年都15歲，佢食飯㗎嘛，佢算乖喇，我老婆管佢好嚴。」