【姐匙Talk】牛頭黐高層扮熟擺晒款

【蘋果日報】好多香港藝人瓣瓣都叻，主持、唱歌、電視、電影、話劇乜都掂，好似「牛頭」咁，佢以歌手身份出道，後來做埋演員，因為佢個樣夠正氣，深得師奶歡心而上位。近年牛頭離開大台，去過唔同電視台開工，仲連舞台劇都撈埋，認真巴閉。
叫公關迎接佢
不過，前排牛頭因為要做宣傳，所以要四圍做訪問，就連「二奶台」嘅小節目佢都唔放過。不過，佢去到二奶台就擺足大明星款，未做訪問前，已經講明個訪問一定要通知大圍記者，等多啲記者去影佢，又話明要公關喺大門口等佢，因為牛頭話自己唔認得路喎。其實一般只要明星卡士夠，你唔通知記者，佢哋一樣會去做，所以其實都睇到牛頭喺度擺款扮嘢。
咁由大台轉職二奶台嘅資深公關「聰明豆」都好識做有照做，安排晒相熟記者到場，佢仲親自迎接牛頭入二奶台，認真畀足面。不過牛頭仲未夠喉，佢做訪問之前，忽然問聰明豆，由大台過檔二奶台嘅高層「黑森林」喺唔喺公司，話好掛住佢，想同佢敍舊喎！於是聰明豆搵埋黑森林同牛頭一齊吹吓水，牛頭仲叫記者同佢哋影合照，擺明想話畀人知，佢得到二奶台兩位高層嘅熱烈招待。最好笑嘅係，事後黑森林同人講，佢同牛頭喺大台時，連十句說話都冇講過，其實冇乜舊好敍，真係搵佢嚟搞！
撰文：Jessie
本欄逢周五刊出
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。