食太多工程「消化不良」

【蘋果日報】【合併意難平】港鐵因沙中綫工程醜聞而招牌盡毀，當年沙中綫原本由九鐵投得，但港鐵拒與九鐵在金鐘站接駁，兩鐵合併後港鐵獨力負責高鐵、沙中綫等多項工程，導致「消化不良」。
管理層難以兼顧
田北辰透露，兩鐵合併其中一個原因與沙中綫接駁問題有關，2002年九鐵奪得沙中綫工程，「去到金鐘站，港鐵話我冇可能同你接駁，如果要接駁你要補貼畀我，如果唔係你哋（沙中綫乘客）要全部行出街，再行番入去（港鐵），咁死緊啦」。兩鐵合併後，沙中綫改由港鐵重新設計興建，才解決金鐘轉乘問題。
他指高鐵及沙中綫先後出問題，原因是在同一時間要興建多項鐵路工程，「港鐵同時間食得太多嘢，消化不良」，興建鐵路與營運鐵路不同，太複雜令管理層難以兼顧，「今日如果九鐵起沙中綫，港鐵起高鐵，大家分擔一半，我相信唔係咁嘅局面」。
同時，高質素工程人才亦難求。他指不少工程管理人員與承建商有千絲萬縷關係，當中未必涉及私利，但難免講關係，「同你合作開，緊係順利啲，大家拍吓膊頭搞掂佢」。他已向政府建議，港鐵新行政總裁必須由本地工程背景人士出任，他反對再招聘海外人士因他們未必熟悉香港價值觀。他已推薦兩位工程界人士給政府，兩人都尊重程序，不會只「畀面」大承建商。
■記者麥志榮