【娛樂人物】陳柏宇符曉薇　遇上對的人

【蘋果日報】陳柏宇和符曉薇是圈中幸福夫婦的人辦，兩人結束七年之癢，雙雙步入人生另一階段，在慶祝結婚一周年的同時，又充滿喜悅期待囡囡的誕生。兩人越來越有默契，符曉薇認為是因為「遇上對的人」。
撰文、攝影：馬建華
陳柏宇最近派了新歌《認真如初》上台，日前他跟懷孕中的太太符曉薇在新蒲崗接受專訪，兩夫婦臉上不時掛着幸福笑容，更情深對望，從拍拖到結婚一年，兩人越來越「目中無人」，只容得下對方，正如新歌想呈現的那份歷久常新的濃情與感動。二人越來越有默契，皆因生活上不時製造小驚喜，陳柏宇說︰「好易，唔使壓力去做。」
維繫感情靠驚喜
陳柏宇望着太太說：「我覺得如果大家可以做啲嘢，會令感情維繫得好，所以有少少驚喜係好事，雖然我唔係好識，但有時發自內心去做，效果更大，好似有次我舉住個牌接佢機。」符曉薇坦言當時的畫面令她非常驚喜及難忘，最重要是老公連自己名字也寫錯，陳柏宇笑說：「呢個係我同你嘅特別寫法。」符曉薇即拋下一句：「冇人會寫錯字，而佢畀我驚喜嘅仲有之前突然買咗架電單車。」即使丈夫寫錯名又買電單車，但她覺得夫婦那份愛及默契全因「遇上對的人」。
兩人婚後不久便造人成功，心急為人父的陳柏宇直言拍拖的七年時間過得好快，但太太懷孕時間就特別漫長。符曉薇說：「係你心急想見BB出世，咁拍拖時係因為歡樂時間過得特別快。」
懷孕後脾氣更好
符曉薇懷孕後，陳柏宇大讚她的脾氣好了：「佢又冇乜半夜提出無理要求，可能我已經習慣。」符曉薇即說：「你唔好誤導人，我成日都提醒自己唔好因為懷孕脾氣差，相反佢就好緊張，有產前暴躁症咁，哈哈！」不過，符曉薇承認陀B能保持愉快心情全因身邊有位開心先生令她安心，因為陳柏宇來來去去只會去工作及健身室，令她很有安全感。
BB即將出生，陳柏宇當然要狂搵奶粉錢，近月來他因為工作忙又頻撲，身體都出現毛病，上星期更因為發燒入院。符曉薇指丈夫生病全因工作過勞，只要有時間讓他休息便會康復。
早前陳柏宇灌錄新歌時，曾患上聲帶出血，他感激公司及客戶體諒，將錄音延期，直至他聲帶康復才錄。他說：「休養期間我都有照做live節目，只係可以唔講嘢時就盡量唔講。」雖然工作勞累，但當他想起愛情結晶品即將誕生，負能量都迅速化為動力。
首飾提供：周生生