搬龍門拒停工　遭民意反噬

【蘋果日報】【拆局】特首林鄭月娥民望在山竹襲港後急跌，政界幾乎一致認為與林鄭及港府處理風災善後失誤有關。有政界形容林鄭在處理善後問題一錯再錯，搬法例出來否定風災後停工一天，「已經令好多逼成幾個鐘趕返工市民，覺得佢不近人情同傲慢」，之後林鄭接連出席高鐵通車活動，卻不落區視察災情，「更加令人覺得佢重視擦北京鞋多過關心香港人」。
「市民覺得佢只重視擦北京鞋」
有政界人士分析，今次結果正好反映林鄭上任以來主打民生議題，其實是一把雙面刃，一方面可以令市民在一地兩檢、修改議事規則等政治議題的重視度減低，「政府喺政治議題面對反對聲音少咗」，但另一方面，若政府在民生議題上不符市民期望，民意反彈就會更大，「林鄭講乜政治嘢，都拎民生先行去擋，當有一次市民發現原來政府喺民生議題上唔聽市民意見，民意就會反撲」。
另一民主派中人更指，以往林鄭要推動民生政策，「民主派同佢講程序，佢就拎市民有要求、政府要特事特辦反駁」，但到今次主流民意要求風災後停工一天，「林鄭又忽然拎法例、程序去反駁，唔再講民意、特事特辦，市民覺得佢所謂重視民意其實係假、甚至係不近人情」。林鄭更失策的是，風災後未見她即時落區、運房局局長陳帆更是「冇影」，「但高鐵通車佢兩個就到齊，咁只會令市民覺得佢只重視擦北京鞋」。
■記者莫劍弦