葉氏化工求變　屢收購搞創新

【蘋果日報】十年樹木，百年樹人，成就一間企業又要多少年？成立至今47年的葉氏化工（408）率先訂下「百年葉氏」的目標，最近更動作多多，既收購駱駝漆，又入股大嘜養車，一字記之曰變，葉氏企業發展總裁兼太子爺葉鈞更表示，「就算冇百年葉氏呢個口號，唔去諗新嘢都會滅亡，生意停滯不前係死路一條。」
購駱駝漆　入股大嘜養車
葉氏化工是傳統工業股，四大業務包括溶劑、塗料、油墨和潤滑油，收購駱駝漆壯大塗料業務不難理解，但「無情情」入股大嘜養車幫汽車換油未免令人意外，葉鈞直言：「一間舖成熟嘅話，服務一個小區有超過3,000個客嘅數據，有車種、車油、消費能力，可以由此諗點發展車嘅其他產品，並且係現時葉氏冇推出。」
葉鈞推算，直至明年底將有約20萬的客戶數據，他希望由「車」開始，再往「家」的方向推進。「多數車主都係業主，有車就有樓。」「換油要30分鐘，呢段時間坐喺到，會唔會諗吓，隔籬放家中清潔劑呢類產品？」
葉氏化工以2,152萬元（人民幣．下同）入股大嘜養車27.8%股權，目前在全國有30間分店，主要集中在大灣區，目標在3年後達到1,000間。要高速發展，就要靠「加盟」，現時加盟資金為50萬元，分店約9個月回本。「短期內做支援角色，因為唔係大股東，當投資startup（初創企業），唔排除控股。」
千方百計創新，皆因工業產品競爭太激烈，解決方法只有三條路，「生產有咁低成本就咁低，有規模效應，溶劑業務就體現到，人地最死，我都仲有錢賺；再唔係投入好多技術，研發得你有人哋冇，任你叫價；最後就係品牌。」技術一直有投放，但最快見效是品牌，從市場、消費者着手，買駱駝漆、入股大嘜養車就是要營造品牌。