【姐匙Talk】查車死穴怕老鼠

【蘋果日報】娛樂圈藝人個個都有死穴，尤其係嗰啲喺螢幕上好似好勁嘅猛男，現實中都有細膽一面。好似巨星級男星「查車」，佢係鋼條型猛男，操得一身肌肉，但原來佢勁怕老鼠。
有次查車同朋友喺大牌檔食嘢，忽然有隻老鼠竄上朋友大腿，查車見到嚇到鼻哥窿冇肉之餘，仲驚到即刻彈開狂跑，連「拜拜」都冇講就走咗，真係誇張到痹！之但係查車經常喺陋街僻巷拍戲，嗰啲地方咁多老鼠，你估佢點對抗？原來每次拍戲之前，查車會叫工作人員喺後巷或者有老鼠出沒嘅地方打鑼打鼓，或者放炮仗嚇走啲老鼠，又幾有計噃。
聞打針逃跑
不過最搞笑係查車連米奇老鼠都驚，仲嚴禁身邊嘅工作人員着米奇老鼠衫，試過有fans唔知碇，竟然送印有米奇老鼠嘅嘢畀佢，搞到平時對住fans一定笑口噬噬嘅查車，打開份禮物後，當堂忍唔住皺眉兼黑面，嗰股怒氣真係㩒都㩒唔住。
其實除咗查車怕老鼠，圈內有名嘅「國際巨星」一樣好怕打針，咪睇佢平時做開運動、身手又好，但佢一聽到醫生話要打針，就會即走。有次國際巨星去歐洲旅行，唔小心患上感冒，於是就去咗當地一間醫院求診，醫生話要同佢打針，佢就即時耍手擰頭，仲藥都唔攞走人，估唔到堂堂一個大男人竟然怕打針。
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。