呂麗君「超級富婆」淡妝冇行頭

【蘋果日報】【爆相爆片】呂麗君自從同劉鑾雄（大劉）分手後，就忙於管理同名基金會事務，生活仲變得好低調，不過日前有《蘋果》讀者劉小姐透過「爆相爆片」喺跑馬地嘅養和醫院見到呂麗君。
逗留半個鐘
劉小姐話嗰陣大概係下晝4點半，呂麗君身穿淡粉紅色短袖上衣同格仔短褲，坐住以佢大女劉秀盈英文名（Zoe Lau）同名車牌嘅Telsa房車出現，劉小姐仲話：「佢一落車，見佢化咗淡妝，打扮樸實，就即刻戴口罩行入醫院，見佢先行咗去門診搵一個朋友，仲畀咗一袋嘢佢朋友，傾咗一陣，就拎住一盒嘢上咗去33樓探病，佢大概探咗半個鐘就離開，冇除個口罩上番私家車。」睇到啲相，雖然呂麗君身邊已經唔見有大劉班保鑣人海式隨行，不過話晒佢都係「超級富婆」，生活依然好有質素。
前年，大劉發聲明宣佈同紅顏知己呂麗君嘅感情已經係過去式，大家早喺14年分手，仲話分手前送畀呂麗君嘅現金同禮物超過20億元，佢已經係「超級富婆」，不過大劉亦表明自己會履行父親責任，喺經濟同教育上，會照顧同呂麗君所生嘅一對年幼子女，大劉喺同年與甘比註冊結婚，正式畀對方「劉太」名份。