【娛樂人物】惠英紅自虐考驗

【蘋果日報】惠英紅與姜皓文首次合作電影《翠絲》，於戲中飾演夫妻，惠英紅面對的不但是婚姻破裂，更是老公由男人變成女人。惠英紅拍攝兩人的攤牌戲時，用了一種自虐方式去表達，激動瞓地撐腳兼狂摑自己，她自言打完面部有點腫。
撰文︰羅婉玲
攝影︰仇志德
惠英紅與黑仔姜皓文在戲中已經分房瞓，行動上已分居，並無夫妻之實。演技豐富的她演這保守的跨性別人士太太，也感到考驗。早前惠英紅在銅鑼灣接受訪問，談到這個在戲行中打滾的女子。她說︰「我自己做咗啲資料搜集，首先佢好保守，加上職業帶動佢嘅生活，戲班子好要面。」
老婆變姊妹
談到和黑仔一場攤牌戲，惠英紅坦言很深刻︰「戲入面我從來冇接觸過跨性別人士，突然間老公要離棄你，佢唔係有二奶，而係要同你做姊妹，好驚訝，好無地自容。」
事前惠英紅跟黑仔及導演商討，不會斬件式分開拍︰「我哋事前行咗啲位，攝影師hand held部機跟住我哋做嚟拍，一氣呵成。一個女人第一次同老公攤牌，呢個女人嘅性格出晒嚟，瞓落地撐晒腳係咁拍自己，當時我都冇預計到情緒係咁痛，有啲女人嘅痛，係可以透過自虐形式去表達，拍完我塊面都有少少腫，我鍾意演得生活化，好自然。」
讚黑仔破格
除了演技，惠英紅對自己亦要求高，好像戲中要唱粵曲，導演、監製讓她自選曲目︰「佢哋問我想唱乜，我諗喺一個茶聚小館，我揀咗唱男聲嘅《鳳閣恩仇未了情》，我以前經常唱女聲，今次揀男聲唱，想巧妙咁顯示呢個女人嘅性格。」不過可惜拍攝時現場收音有雜聲，最後無奈棄用，要另找師傅為她配聲。
首次跟黑仔合作，惠英紅大讚對方演跨性別人士夠突破，至於接觸跨性別人士，她坦言在邵氏年代拍電影《掌門人》時，有一場戲找來成班跨性別人士演出，「佢哋個個都咁靚，佢哋嘅心路歷程，我都好熟悉，甚至我覺得佢哋仲靚過女人。」