【馮仁昭四圍超】林峯同千語撇清 陳凱琳買首飾畀BB

【蘋果日報】陳凱琳、郭羨妮、林峯同余德丞噚日現身沙田馬場賽馬活動，陀B嘅陳凱琳着5吋幼踭鞋開工，佢話得到老公鄭嘉穎批准，只要活動後換平底鞋就可以。對於嘉穎日前話怕佢反口「過一戙」要聖誕禮物，陳凱琳笑言：「嗰日我哋出街，佢問我想要乜嘢聖誕禮物，我就諗若果佢買畀我，我咪要買畀佢，所以我就提議不如今年互相都唔好送，咁就冇壓力，點知佢諗諗吓又覺得我陰佢。」提到收過嘉穎最貴重嘅首飾係婚戒，不過陳凱琳擔心遺失所以好少戴，佢哋仲諗定要買首飾畀BB。
林峯合資做馬主
林峯透露明年可能同朋友合資做馬主，問到今年聖誕會唔會帶女友去朋友屋企慶祝，同埋之前傳舊愛吳千語要求復合？林峯話：「我記得一年前同傳媒朋友講，感情嘢唔再分享。」郭羨妮話聖誕要留港同囡囡溫書：「會帶佢去主題公園玩，佢都會呻辛苦，我會督促佢，尤其學校功課都多，都擔心教導時傷害母女感情，所以不時提醒自己控制脾氣，將來課程再深，惟有畀囡囡補習，免傷和氣。」
同場嘅雨僑對於老闆蕭定一旗下嘅HMV傳財政唔好，佢話唔擔心：「藝人經理人部只佔公司一小部份，所以唔受影響，老闆未有親自派定心丸，但高層已開會清晰表示一切運作正常。」
撰文：馮仁昭
長青網 - 一站式長者及護老者生活資訊網站