新聞類別
娛樂
詳情#
【蘋果日報】香港首富李嘉誠每年元旦都風雨不改，帶埋一班子孫到柴灣香港佛教墳場拜祭亡妻莊月明。今年亦唔例外，噚日朝早8點，李嘉誠嘅保鑣先到現場視察同打點，跟住就見到細仔李澤楷（Richard）首先到達墳場，然後李嘉誠同大仔李澤鉅、媳婦王儷橋、四個孫仔、孫女都到達，而李澤鉅嘅仔女全部都戴晒黑超同口罩。問李嘉誠有冇見Richard嘅三個仔，李嘉誠冇回應，再問佢會唔會催Richard結婚？李嘉誠就話：「今日唔講呢啲喇！」之後李嘉誠就同兩個仔先到地藏殿上香，跟住再到墳前拜祭。李嘉誠同Richard好好傾，反而同大仔李澤鉅就好少嘢講。佢哋逗留大約45分鐘就陸續離開。
避談梁洛施郭嘉文
Richard被問到會唔會支持前度女友梁洛施復出拍戲、有冇同三個仔見面、有冇計劃同郭嘉文結婚等問題嗰陣，Richard都一概冇回應，之後就一個人離開。另外，臨走時，李嘉誠喺車度等緊大仔一家上車嗰陣，突然有個男人行到李嘉誠車旁，話有個大project，李嘉誠即刻話：「我已經退咗休喇！」最後澤鉅同太太上咗另一部車離開。
撰文：馮仁昭
回應 (0)
