【姐匙Talk】V面人唧牙膏報喜得罪廣告商

【蘋果日報】大台藝人近幾年一窩蜂同另一半閃婚閃生BB，建立新家庭之餘，喜慶新聞仲製造唔少搵真銀、品牌贊助商機，「第一次」出席活動親自公佈好消息，吸金之餘又有叫座力，傳媒又鍾意用大篇幅報道，呢條成功雙贏方程式，已為唔少新一代藝人同客戶傾好嘅無形合作條件。
好似最近「V面人」同佢另一半，佢哋由結婚到婚後已密密合體搵真銀攞贊助，認真精打細算識搵錢，早前喺網上宣佈有BB，V面人就連環出活動搵奶粉錢，一個月起碼接十單、八單，因為每次都要有話題，佢就玩「唧牙膏式」報喜，不過呢招就辣着咗客戶。
出活動反口
話說V面人公佈陀B後，理應第一次出活動就講感受，之前已同廣告商傾好，點知到活動前幾日，佢就接咗另一個活動，搞到頭啖湯就畀咗第二個客，第一個客當然唔高興啦，V面人就補鑊，話會喺活動講生仔定女，點知到當日就竟然反口，話要保持神秘，又話要同長輩商量，搞到個客嬲到講明永不錄用。雖然得罪咗個客，但係V面人似乎唔多志在，見佢最近繼續密密接job，每次仲係唧牙膏講少少，估計到佢生之前，佢都長做長有。
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。
長青網 - 一站式長者及護老者生活資訊網站