【姐匙Talk】聲大大甩拖唔敢囂

【蘋果日報】有句話「面係人畀，架係自己丟」，呢句嘢嚟形容「聲大大」就啱喇！最近我姐匙同一位朋友聚會，講起早排喺街度見到聲大大，原來朋友同聲大大係校友。
聲大大當年仲係學生妹時，確實幾靚女，所以喺校內算係風頭躉。但佢年紀輕輕，已經好高竇，隻眼仲生喺額頭度，兼且頭岳岳咁行路，份人寸嘴到爆，點解？事關佢當年識咗個夜場少爺，後生女有位有背景嘅人照住，唔寸就有鬼啦，至於佢哋點識就唔知喇！
後來聲大大入行做咗藝人後，當然甩咗夜場少爺，費事被人知佢嘅過去。而佢之後話晒叫做明星仔，比起以前就更加巴之閉。大約十幾年前，朋友喺街遇到聲大大，一場舊同學，大家又迎面見到對方，理應會點頭打招呼，但係聲大大竟然當人透明，扮唔識繼續行。
當舊同學透明
事隔咁多年，聲大大又有番咁上下年紀，早排仲甩拖回復單身，可能諗住自己重新上市，當年嘅囂張態度竟然有轉變，似乎收斂少少。前排姐匙朋友又再次遇到聲大大，今次佢就一反常態，懶熱情咁想同朋友打招呼，但係朋友經過早年俾人無視之後，諗番起聲大大啲態度，即還以顏色反問：「你邊位呀？」當住咁多人面前被窒嘅聲大大，當然係臉色一沉，好冇癮咁自動彈開，呢啲咪叫風水輪流轉囉。
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。
長青網 - 一站式長者及護老者生活資訊網站