【姐匙Talk】貓女郎贈波餅猛道歉

【蘋果日報】最近呢一年娛樂圈特別多喜事，生小朋友同結婚呢類開心事特別多。好似貴為女神級嘅靚女「貓女郎」咁，冇幾耐之前嫁人，姐匙特別戥佢開心。貓女郎係選美冠軍出身，有樣有身材，不過情路一直唔係咁順，佢出道之初撻着當時未上位嘅「健身男」，佢唔嫌男方窮，仲同男友蝸居村屋，不過佢咁為得男友又點，呢段感情只係維持咗兩年就玩完。
好在貓女郎搭上咗「烚哥」，雖然當時俾唔少人話佢係小三，冇幾耐仲俾男方拋棄，貓女郎當時事業愛情兩失意，真係慘慘豬。好在貓女郎上年終於嫁咗畀城中鑽石男，都算係好人有好報。點解咁講？因為姐匙有個男性朋友，早前搵貓女郎影相，貓女郎喺呢輯相係扮知名卡通女主角，而呢輯相嘅男主角，就係姐匙嘅男性朋友笠上卡通公仔頭套同膠手膠腳扮嘅。
扮性感卡通主角
呢套卡通女主角衣着都幾性感，加上貓女郎身材又好，而且影相嘅時候，貓女郎又成日要蹺住男主角，多次請男主角食波餅，搞到姐匙位朋友都好唔好意思。點知貓女郎居然細細聲同「面都紅晒」嘅朋友講：「對唔住呀，成日撞到你！」事後呢位男性朋友話成世人都未試過享受完靚女嘅波餅之後，竟然唔會畀人叫非禮，反而仲係靚女向佢道歉咁筍。貓女郎蝕底咗都仲同人say sorry，係咪又純又禮貌得過份先？
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。
長青網 - 一站式長者及護老者生活資訊網站