【姐匙Talk】女神玩失蹤得罪客戶

【蘋果日報】「女神」入行以嚟一直都冇乜代表作，要將佢分類嘅話，唔知道佢係模特兒定係演員，但因為佢外表清純討人喜愛，曾經有唔少客戶都鍾意搵佢合作。冇錯，講緊係「曾經」，事關有唔少同佢合作過嘅客戶，見識過佢嘅做事作風，通常合作過一次就唔會再搵佢。
點解姐匙會忽然講起呢個人？之唔係佢之前忽然喺網上俾人鬧，當時仲覺得好奇怪，冇理由吖，女神斯斯文文都會得罪人？唔講猶自可，一講起佢，即刻有好多苦主出嚟申冤，個個講起佢就嬲嬲豬。
等到入黑唔見人
其中一位苦主同姐匙講，話早排搵女神影相，由於除咗佢仲有唔同嘅模特兒、藝人，每人有唔同嘅影相時間，點知等吓一個鐘、等吓又一個鐘都唔見女神出現，初初女神助手都有回覆，不停講唔同嘅原因話要遲少少到。點知等到入黑，全部人都影晒，女神都仲未現身，後來更加冇影，嬲到個客即刻就掉佢入黑名單，仲搵人打畀女神，叫佢一世都唔使嚟喇！
當然，如果一個人話女神人品有問題都可能係誤會，但如果好多人都咁講，甚至係曾經同佢共事嘅人都咁講，咁我諗佢都要好好檢討一下，因為有曾經同佢合作過嘅人話，呢個人真係好叻，最叻就係扮無辜同委屈，所以冇乜人同佢合作得長久。
撰文：Jessie
本欄逢周五刊登
【姐匙Talk】
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。
長青網 - 一站式長者及護老者生活資訊網站