【馮仁昭四圍超】老婆影大肚寫真　阮民安做得戚豬爸

【蘋果日報】 有樂壇小強之稱嘅阮民安（Tommy），上年報喜指模特兒老婆Eva再懷孕，快將兩歲嘅囝囝阮治童好快做哥哥，目前Eva已經陀B達8個月，進入倒數階段，所以Eva已停工待產，而佢之前去日本為溫泉旅館拍宣傳相，就順道影埋大肚寫真。
Eva話前日趁農曆年初七，一家三口就去咗玩敍天倫，又話囝囝已經知道媽咪肚中有弟弟，不時會錫媽咪巨肚，佢話：「上次生大仔，痛咗好耐，今次我都係揀順產，雖然隨時生得，但我未執走佬袋，其實上胎都用剩咗啲物資，可以拎番嚟再用。」
兩個夠唔追女
Tommy又話屋企將多添一名新成員，所以要再努力賺奶粉錢，佢話：「暫時兩個夠晒數，唔追女啦，我都鍾意囝囝，今次又生仔，整定我要同萬千少女結下不解緣。」問佢會唔會幫老婆剪臍帶？Tommy話自己怕血淋淋，所以老婆生仔只會入產房打氣，唔會剪臍帶。
撰文：馮仁昭
長青網 - 一站式長者及護老者生活資訊網站