【姐匙Talk】祖傳二萬元買底衫

【蘋果日報】「祖傳」細細個就喺片場打滾，可以話見盡世態炎涼。到佢紅極一時，喺東南亞真係好多人鍾意佢儍儍大細路嘅性格，加上敏捷嘅身手，贏得唔少人喜愛。不過自從佢近年搵人仔，加上唔少負面新聞，所以佢都少咗喺香港現身。
祖傳以前仲未咁不受歡迎嗰陣，喺片場都幾可愛，仲有好多逸事。有次祖傳拍戲，因為多動作鏡頭，佢就出晒汗，但係佢又有潔癖，所以每次都會準備好多底衫做替換。點知嗰次可能NG得多，唔夠底衫換，佢叫咗個新嚟嘅司機幫手去買底衫。祖傳順手就畀咗一大叠金牛，大大話都有成兩萬幾，個新司機心諗買幾件底衫要唔要咁多錢？當佢去到中環置地間舖頭時，就同啲職員講祖傳訂咗衫，職員就話：「係呀，呢度十件衫，已經打咗折。」司機先知嗰叠錢只係夠買十件，計落都要二千元一件。
送梳化畀搬運工
又有一次祖傳拍完戲，要啲搬運幫手搬走啲道具返自己個倉。有位搬運工見到張真皮梳化好靚，就多口講句：「呢張梳化襯晒我屋企。」咁啱畀祖傳行過聽到，佢就話：「兄弟，係咪啱用？係就搬走。」搬運工梗係唔敢要啦，點知祖傳就攞把鎅刀出嚟話：「一係你攞走，一係我鎅爛佢。」最後位搬運工就多咗件價值兩萬幾嘅真皮梳化喺屋企。
撰文：Jessie
本欄逢周五刊登
【姐匙Talk】
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。
長青網 - 一站式長者及護老者生活資訊網站