【娛樂人物】周國賢HeHe治情緒病

【蘋果日報】走出情緒病困擾的周國賢，慶幸身邊有理性的黃曉暉（高佬）和感性的藍奕邦（阿邦）陪伴，令他走出困惑。39歲的周國賢下月底在麥花臣場館舉行三場音樂會，並以日文漢字「仲間」為題，意思是「擁有共同理想興趣的人，走在一起追夢」。周國賢日前在九龍灣受訪時就大談身邊的「仲間」。
撰文：馬建華
攝影：陳俊強
周國賢與韓裔妻子育有三女，出道十五年的他，回想五年多前，面對情緒不穩，毅然離開香港到加拿大，藍奕邦不問因由飛到當地陪伴，他說：「嗰時就發現呢一個就係仲間，係佢令我拎番起支結他，我嗰時情緒唔太穩定，想寫歌都寫唔到，後期直情唔想拎起支結他，佢嚟搵我話有首歌《離開拉斯維加斯》，寫完chorus就寫唔到，佢引導我寫歌。」
組Band搵錢
另一位仲間是黃曉暉，與周國賢識於微時，周國賢大爆人生第一次摸結他是在高佬的床上，回憶兩男床上這一幕，他即失笑：「好HeHe嘅感覺。」他們當年在新西蘭讀書時組成樂隊Zarahn，曾一齊錄卡式帶賣錢：「我哋錄咗90分鐘嘅歌，跟住親手設計封面，拎番學校每盒賣五元新西蘭元（當年約20多港元），全部賣晒，嗰刻我發現原來音樂係賺到錢，我哋一餐韓燒就食晒啲錢。」周國賢預告下月音樂會，會用舞台劇呈現跟高佬床上一幕：「我哋唔會有對白，用音樂方式去表達。」
完整思維
周國賢感恩高低起跌都有仲間在旁：「我覺得係幸運，每個時期都有適合嘅仲間出現，阿邦喺嗰時幫我，高佬好似同我互補不足，我係一個寫歌唱歌、唔會設計太多，以感覺行先。每當行到好遠，佢會拉番我轉頭，我加佢就好似一個完整嘅左腦同右腦。」
長青網 - 一站式長者及護老者生活資訊網站