【姐匙Talk】成嚿木玩爆破嚇喊小艷星

【蘋果日報】成功非僥倖，好似大導演「成嚿木」咁，拍完一輪荷李活大製作，連外國大明星「高佬」都爭住搵佢合作，依家可以話係蜚聲國際，為全世界華人增光。成嚿木成功之處，最重要係佢用人得其法，即使最戲屎嘅演員，都可以有影帝、影后級嘅表現。
話說成嚿木未上位前，已經歷過一段好長嘅冰河期，一度被視為票房毒藥，搞到佢為求有工開，曾經要以唔開名方式，暗地為幾套電影執導，當中有一部戲由一名「小艷星」演出。有場戲講小艷星要好驚慌咁走過一段路，不過成嚿木覺得小艷星唔會交到戲，於是佢就偷偷地叫工作人員喺呢段路加入爆炸效果，然後喺開機拍嗰陣就加呢個場面。小艷星埋位真係嚇親，就做到好驚嘅表情。不過佢嚇到喊之外，仲因為跑得急扭傷咗。
意外燒片廠
不過，成嚿木之後拍另一套戲，又係有爆破場面，當大家以為好順利咁拍完，點知原來有少少火種上咗近天花板嘅暗角位。由於當年啲片場設備簡陋，好多時天花位都會加大量棉花，用嚟吸收迴音。好衰唔衰啲火種慢慢燒着棉花，大家又掛住收工，所以冇人留意到。後來俾看更見到出煙，叫消防嚟先搞得掂。雖然及時發現，但搞到片廠要停工幾日維修，加上老闆唔見一筆，成嚿木惟有攬上身，最後俾老闆省到立立令。
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。
長青網 - 一站式長者及護老者生活資訊網站