【姐匙Talk】黃田小器趕絕東風

【蘋果日報】方丈一向好小器，得罪過佢哋嘅圈中人，唔單止冇得返轉頭，就連露個背影嘅機會都唔使旨意。「東風」本來喺公司要風得風，要雨得雨，不過就俾同佢咁高咁大嘅「黃田」狂篤背脊，東風覺得再留喺度都冇意思，選擇離開。點知東風一走，連佢班老友都冇運行。
由於黃田勁唔妥東風，所以東風喺外面撈得更掂都好，黃田都要趕盡殺絕，除咗唔畀東風涉足佢有份嘅節目之外，連東風之前拍好咗嘅節目，全部都要重新編排，盡量要將東風全面消失。早排東風有位老友搞咗單慈善嘢，本來已經搵咗東風幫手，但黃田一知道有東風份，就喺度搞出多多事，仲要逼東風老友踢東風出局。
唔畀面前輩
其實黃田仲有做小動作，話說早排多春茗、晚宴，都邀請唔少圈中台前幕後食飯，之但係逢係牽涉東風做搞手嘅飯局，就點都唔畀東風出席，就算係啲德高望重嘅前輩出口，話想嗌埋東風嚟坐吓，東風亦一早答應咗，但係黃田就一於唔畀面，理得你班地位崇高嘅前輩有冇面子，總之東風唔可以出現，搞到前輩見到東風好尷尬，惟有同佢講句唔好意思，下次再約東風私下食飯。
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。
長青網 - 一站式長者及護老者生活資訊網站