新聞類別
娛樂
詳情#
【蘋果日報】
現年72歲嘅羅家英曾經喺05年患上肝癌第三期，經過治理後已康復。家英哥上月進行前列腺細胞檢查，做咗一個接受穿刺手術，之後家英哥返內地為自己主演同有份投資嘅網絡電影《心願清單》開工，其間不幸細菌感染及發高燒至41度。家英哥為免影響拍攝進度，日間如常開工，夜晚就返醫院吊鹽水，結果引發膀胱同腎發炎，近日家英哥返港後入住九龍聖德肋撒醫院接受治療，因為契女楊玉梅探望而被揭發患病入院。
「醫生話好好」
家英哥喺醫院留院多日，噚日下午3時半，見到家英哥離開醫院，原來係要同友人商談要事。記者見家英哥喺一男一女友人陪同下離開醫院，當時佢戴上口罩、漁夫帽同黑超，仲披上頸巾包到冚。問到太太汪明荃有冇嚟探病時，家英哥都未有回答，只係話：「有啲朋友嚟搵我傾啲嘢，傾完之後都返番去。」問到佢幾時出院，家英哥話：「最快都聽日啦，不過冇咁快。」再問到身體狀況如何，家英哥表示：「醫生話其實都好好，我轉頭傾完嘢都上返去。」
汪明荃日前為無綫節目錄影時，曾交代家英哥情況，希望佢多啲休息，如今若然知道佢留院期間出外「傾嘢」，家英哥分分鐘會再次被阿姐責怪。
撰文：馮仁昭
長青網 - 一站式長者及護老者生活資訊網站
回應 (0)
