【姐匙Talk】燈膽孤寒萬歲側側膊

【蘋果日報】相信好多人都聽過娛樂圈嘅人好鍾意講「萬歲」，而「萬歲」通常發生喺片場，正所謂有大食大，好多時男女主角為咗慰勞一班工作人員，等大家食好啲，都會喺放飯或者消夜時段「萬歲」，意思即係買啲好嘢返嚟片場請大家食。
不過，唔係人人都咁闊綽嘅，我Jessie就聽講女藝人「燈膽」，雖然佢唔算係乜嘢重量級巨星，但佢由初初出道只係「舞得頂」成員，到後來有機會單飛發展唱吓走音歌，竟又好彩俾導演睇中捧佢拍電影，依家仲威到套套都擔正做女主角，但一直以來，佢都未試過「萬歲」！
雖然，「萬歲」係心意，唔可以逼人畀錢請大家食嘢，但有人同我Jessie講，話原來燈膽出名孤寒，要喺佢銀包攞一蚊出嚟，真係難過登天，就連佢身邊嘅工作人員都同人講過，話燈膽咁多年來都未試過請身邊人食過一餐飯，而且工作其間嘅開支，都會計到盡，一毫子都唔會蝕底，大家惟有當呢個係美德啦！
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
長青網 - 一站式長者及護老者生活資訊網站