【馮仁昭四圍超】72歲黎小田肺炎入院

【蘋果日報】今年72歲嘅殿堂音樂人黎小田，前日有傳入咗醫院，本報打電話畀黎小田，佢冇接電話，就搵同佢識咗好多年嘅陳欣健，問最近有冇同黎小田聯絡？陳欣健透過短訊話：「沒有啊，聽說他身體有問題。」對於有傳黎小田入院，陳欣健就話：「真的不知道，我也想知道，純粹關心老朋友，打他電話沒人接。」直至前晚，終於搵到黎小田，佢以短訊簡單回覆：「我入了醫院，肺炎。」問佢身體有冇大礙？佢就話：「OK la」，至於幾時出院？佢就冇答。
「早排有感冒」
黎小田嘅老友薛家燕噚日喺銅鑼灣出席演唱會記招，話曾經到過醫院探黎小田，家燕姐話︰「小田哥早排有啲感冒，我知道佢入院，我都有探佢，依家冇乜嘢，出咗院啦！」家燕姐同黎小田識於微時，75年仲齊齊為麗的電視主持音樂節目《家燕與小田》，當年兩個日久生情拍過拖㖭。
撰文：馮仁昭
長青網 - 一站式長者及護老者生活資訊網站