24個鐘培訓 彤叔掌櫃讀足半年

【明報專訊】「小小超」李澤楷當年成日叫香港人要增值，蒙能（0276）主席魯連城同執行董事翁綺慧上年10月畀港交所（0388）譴責，「被迫」響應要上為期24小時嘅企業管治培訓課程，小琴噚日就望到蒙能出咗通告，話魯、翁兩人終於響呢個月4號完成課程，事隔成6個月先培訓完，魯生唔通偷懶？

誤導投資者 去年10月被譴責

話說港交所響上年10月公開譴責兩人，話佢哋響2007年刊發一系列聲稱同「中國石油」、「國家電力」合作嘅通告誤導投資者，令外界誤會蒙能同大型國企有合作計劃，於是要佢哋去參加「有關合規及企業管治為期24小時之培訓課程」。

綽號「彤叔掌櫃」嘅魯生出晒名長袖善舞，但點解要用成半年先上得完「為期24小時培訓課程」呢？港交所發言人就話，上市公司董事被要求上企業管治課程一啲都唔罕見，佢哋要去證監會認可機構例如香港董事學會申請參加呢類課程，只要6個月內完成就無問題，不過就無統計過每個人平均要幾耐先上完呢啲課程喎。

小琴問過朋友，呢類課程一般比較輕鬆，正常嚟講1個星期1堂，每堂就1個鐘，咁樣上6個月就啱啱好24個鐘，照咁睇嚟魯生似乎真係無偷懶喎。