陳曉「爆料」 國美股價急插

【明報專訊】今年初，國美電器（0493）大股東黃光裕同前拍檔陳曉嘅紛爭，以陳曉黯然辭職落幕，但餘波未了，日前有內地報章話追訪陳曉嘅時候，陳大爆國美嘅「財務漏洞」，即使陳曉事後同公司都急急澄清，都阻止唔到市值噚日唔見咗3.2％。

《21世紀經濟報道》前日有報道，話陳曉「大爆國美財務漏洞」，供應商要喺國美賣貨，就要承擔巨額費用，由總部到大區，再到分公司，甚至櫃枱都成為收費點，供應商要向各個層次嘅領導畀相當數量嘅費用，令國美嘅商品價格往往高於其他地方買到嘅，這種經營模式難以為繼。篇故仔仲話，國美唔顧一二線市場已經飽和，提出新開480家分店嘅計劃完全係「賭氣」。

離開國美前仲揸住1.38％公司股票嘅陳曉急急澄清，話嗰個記者斷章取義，文章唔代表佢嘅觀點，仲喺微博上面話，「我做過國美的主席，現在也是國美的股東，對國美有很深的感情，是不會做對國美不利的事情的。」

見到前朝人物說三道四，唔使講，國美本身梗係大反應啦，噚日即刻發聲明話「不會容忍陳（曉）在文章中所顯示的行為以及任何其他關於本公司不真實或誤導的新聞報道，並會採取適當手段保護本公司的權益。」睇嚟陳、黃兩派嘅嫌隙只會愈嚟愈深。