周四非正式股東會 鄭大班告別作

【明報專訊】匯控（0005）周四喺香港搞嘅非正式股東會，除咗香港股東可以現場一睹今年新上任嘅「范歐配」（即主席范智廉、及行政總裁歐智華）組合風采之餘，睇嚟都大有可能係華人大班鄭海泉嘅告別作，搞到小琴心情好複雜，一時都唔知要熱烈歡迎兩位新老闆好，抑或歡送鄭大班好。

Vincent（鄭的洋名）今年5月就會正式退任匯控執行董事一職，聽講佢中國董事長同埋台灣區主席嘅職位，嚟緊都會搵人頂上。佢上年已經無飛去倫敦參加果邊嘅股東會，相信今年佢都會同樣做法。匯豐而家都仲未預算到當日出席人數，各位小股東如果要見識Vincent鄭最後的風采，睇嚟就要早啲去霸頭位喇。

鄭海泉榮休後，匯豐亞太區行政總裁王冬勝就會坐正，成為匯控裏面最大粒嘅「華人大班」。自上一任行政總裁紀勤年代，匯豐亞太區主席呢個位就由行政總裁兼任埋，所以歐智華而家都係做埋亞太區主席。

入住大班屋 王冬勝：平常心

王冬勝雖然已接近匯控傳統60歲嘅退休之齡，不過原來只要老細批准，年紀一到都可以繼續做落去，加上佢稍後將會入住半山的匯豐「大班屋」，名副其實係「華人大班」，睇嚟都起碼「再坐一會」啩。不過王冬勝就謙稱，話一切都以平常心看待喎，聽講嚟緊佢「大班屋」入伙，仲會搞個入伙派對呢！其實「大班屋」亦係匯豐宴客、搞聚會嘅地方，王冬勝一向有「銀行界梁朝偉」嘅稱號，而且長袖善舞，相信嚟緊佢喺大班屋都會有排忙呢。