歐智華史樂山攜手撐欖球

【明報專訊】今日匯豐控股（0005）喺香港同各位小股東會面，新上場嘅「范歐配」（主席范智廉同行政總裁歐智華嘅組合）第一次同香港股民見面，聽講最少幾百個小股東都會親身到總行力撐匯控新班子，唔知會唔會擦出啲乜野火花呢？

噚日歐智華已經現身香港，仲同國泰航空（0293）常務總裁史樂山一齊出席「香港國際七人欖球賽」嘅記者招待會，因為匯控同國泰今年聯名贊助呢個活動。不嬲唔多熱中影相嘅歐智華，同一班「老外」一齊顯得寧舍開心，齊齊搭住膊頭影合照，姿勢都幾盞鬼。

一般本地香港人對欖球都唔多曉，外國人就比較有興趣，不過今年匯控同國泰做贊助商，兩個都係香港人最熟悉嘅品牌之一，或者可以提高多啲本地人嘅興趣，歐智華仲話，想推動欖球喺香港社區普及化，以及喺亞洲各地，甚至全球茁壯成長呢。雖然匯控家要大減成本，但相信佢喺推動健康運動嘅經費，就一定唔會點減喇！