鍾馨稼持中聚股數現羅生門

【明報專訊】「超人愛股」中聚電池（0729）同前董事鍾馨稼嘅恩怨情仇玩咗大半年，噚日又鬧出一個羅生門事件。中聚發咗個澄清通告，話公司內部嘅可換股債券轉換紀錄同阿鍾博士申報有出入，小琴篤一篤計數機，而家係中聚「大股東」嘅鍾博士，實際揸住嘅中聚股票可能連聯交所顯示嘅一成都無喎。

中聚副總裁謝能尹同小琴講，2月22號鍾博士應該仲係揸住12.9億股份同41.8億股可換股債，4月19號佢申報嘅股票突然增加到54.7億股，不過根據公司可換股債券嘅轉換紀錄，公司3月份已按面值贖回38億股可換股債，而且其餘可換股債係同上年收購嘅溢利保證掛鈎，即係除非鍾博士喺呢段時間不斷增持股份，唔係就應該係報錯數嘞。

指已贖部分換股債

小琴用謝生提供嘅資料計咗一次，如果扣除贖回咗嘅38億股可換股債，鍾博士應該只係有12.9億股同3.75億股暫時轉換唔到嘅可換股債，加上佢2月同4月賣咗3次股票，實際應該只係得3.13億股左右，即係只有佢喺聯交所顯示嘅49億股嘅7%唔夠喎。

小琴都計到頭暈，不過打俾鍾博士佢又熄咗電話，唯有睇下接住落嚟仲有乜野新發展啦。