新聞類別
財經
詳情#
【明報專訊】金融海嘯之後，好多零售投資者對複雜嘅投資產品都提高咗警覺，監管當局亦要求銀行加強對投資者嘅保障，尤其係對65歲以上長者同埋缺乏經驗嘅初哥。不過，喺噚日中銀香港（2388）股東大會上，就有一名年長嘅女性小股東提出意見，希望中銀香港可以恢復向長者銷售結構性投資產品，例如外匯或股票掛鈎產品（ELN），以增加投資選擇咁話喎。
作為最大雷曼迷債分銷銀行，中銀香港喺雷曼事件承受好大嘅輿論壓力，所以面對有小股東提出上述建議，副董事長兼總裁和廣北回答時亦小心翼翼，話喺監管要求許可嘅情况下，會積極考慮呢個股東嘅意見。
噚日所見，和總回答小股東提問時態度誠懇，令小股東頗為受落，其中一名男股東更用咗差唔多10分鐘時間，大讚和總回答小股東提問時談吐得體，同埋感謝和總誠心誠意為股東服務，領導中銀香港健康發展。
一半投資買中銀 和總勸喻分散
呢位小股東同時又大彈匯控（0005）管理層，狠批佢哋傲慢同無氣力，所以有別於其他愛持匯控嘅股民，呢名小股東嘅投資組合入面，有一半係中銀香港嘅股份。
聽到呢到，和總即刻插把嘴，奉勸小股東應該分散投資，可見和總並無被小股東激讚而飄飄然也，果然係見慣世面。
報料電郵﹕piano@mingpao.com
回應 (0)
