曾裕出山一年 現代美容發盈喜

【明報專訊】現代美容（0919）經歷風風雨雨，人事變動，噚日發盈喜，睇嚟下個月張成績表應該唔錯。集團話盈利增長主要係市民消費意欲上升，集團又有新服務同產品系列，加埋控制開支，所以有好成績。

集團2006年上市以來，大部分消息都唔多理想，主席曾裕2008年因健康問題請辭、由丈夫李守義頂上。集團2009年換核數師，兼換埋3個獨立非執行董事。集團喺2009年、2010年嘅業績都要發盈警。舊年4月曾裕出山，人事問題似乎少咗，令集團上半年賺番600幾萬，總算轉虧為盈。噚日再發盈喜，相信短期對投資者有啲交代，股價亦立即有反應，收報1.01元，升15％。