四叔以股代息 增1900萬股恒地

【明報專訊】「四叔」李兆基呢幾個月密密增持恒地（0012），噚日仲一次過多咗1873萬股咁多。唔好以為佢再次以大溢價行使佢嘅紅輪（0879），而係佢老人家以股代息，留番多啲錢畀公司。

以噚日收市價52.55元計，呢批新股份總值9.8億元，打工仔夢寐以求嘅1億元六合彩頭獎，四叔談笑間已經袋袋平安咗10倍。四叔早排投資咗100億元來行使紅輪，再足足花咗17億元嚟增持，但都谷唔到恒地去58蚊樓上，隻紅輪都過咗最後買賣日，大家都估恒地會唔會再集資。

不過RBS分析員吳家俊就勸大家唔好太在意集資嘅問題喇，佢話其實恒地呢幾個月賣樓真係落力咗好多，年初到家賣咗成140億元，有足夠嘅錢發展。「就算要錢，利息依然平，其實仍然可以向銀行借，唔一定要問股東攞啫？」佢又話，再者四叔明知紅輪集資唔掂，但都照增持，其實都係計過數，對公司有信心先咁做嘅。