碧桂園再添楊門女將

【明報專訊】「楊家有女初長成，養在深閨人未識。」不過宜家唔係古時，唔似白居易《長恨歌》咁，要送去做皇妃先飛黃騰達。碧桂園（2007）主席楊國強嘅三女楊子莹學成歸來，噚日集團宣布佢加入做董事，年薪130萬人民幣。

呢位富二代今年23歲，喺美國俄亥俄州立大學畢業，主修心理學。小琴搵番學校啲資料，發現佢讀書表現出色，學校通訊話楊家三小姐嘅論文功課，分數攞到Distinction，即係優異成績。佢畢業後曾經喺投資銀行打工，2008年返碧桂園做主席助理，宜家晉身為董事，佢會負責集團財務，包括境外及境內融資。

三女似爸爸 學成返嚟做董事

《新華網》轉載一篇文章，引述《南都周刊》報道，楊國強有三個女兒，大女兒因幼時發燒，智力受到損害。因此，佢培養二女楊惠妍同幼女楊子莹特別用心。 外貌上，楊惠妍似媽媽，楊子莹就似爸爸。不過，佢哋一家好低調，搵唔到相片比對。

楊國強嘅二女楊惠妍已經做緊集團董事，加埋細妹，實行姐妹花上陣。仲記得2007年楊惠妍加入集團時，富爸爸立即將股權轉讓畀佢，令到佢成為中國女首富，成為一時佳話。宜家大女持股59％，唔知呢位富爸爸，會畀幾多股權細女呢？

報料電郵﹕piano@mingpao.com