喬冠華繼女洪晃 微博控訴德銀累輸錢

【明報專訊】一場金融海嘯，揭露咗著名投資銀行推出嘅高風險產品，好似迷你債券、Accumulator點樣令到散戶投資者蒙受巨額損失，但隨着宏觀經濟及資本市場稍稍回氣，投資者又開始重投呢啲高風險產品嘅懷抱，而最近中招嘅，就有中國外交部已故前副部長喬冠華個繼女，內地名女人洪晃。

稱快被「理成無產階級」

有內地傳媒引述洪晃日前喺微博撰文控訴，德銀嘅非保本理財產品QDII「跌跌不休」，令到佢「愈理財錢愈少」，佢仲怒斥德銀嘅私人理財係「全世界最壞的服務」，「快被他們給理成無產階級了」。

由於洪晃嘅微博有成246萬名「粉絲」，所以洪晃此番言論迅速喺微博引起廣泛討論。小琴覺得，呢件事更耐人尋味之處，就係以洪晃曾留學海外，擁有高學歷，以及佢作為內地著名傳媒人嘅判斷力，都依然會誤中呢類投資地雷，背後原因為何。有分析就指出，其實選擇呢種理財投資產品嘅人，大多數對投資嘅評估能力都唔係好夠，主要都係相信銀行嘅品牌。